एमाले टुक्राउनेलाई इतिहासले जवाफ दिनेछः मुख्यमन्त्री शाक्य
नुवाकोट । बागमती प्रदेशका मुख्यमन्त्री अष्टलक्ष्मी शाक्यले पदभन्दा पार्टी ठूलो भएकाले पार्टीबाटै जनताको सेवा गर्न सकिने बताएकी छिन् ।
नुवाकोटमा बुधबार आयोजित एमाले कार्यकर्ता भेलाको उद्घाटन समारोहमा बोल्दै एमाले उपाध्यक्षसमेत रहेकी शाक्यले आफू सदैव पार्टी एकताको पक्षमा रहेको भन्दै पार्टी फुटाएर अरु सरकारलाई सहयोग गर्न नसकेको स्पष्ट पारिन् ।
पार्टीभित्र केही बेमेल भएपनि पार्टी फुटको पक्षमा आफू नरहेको स्पष्ट पारिन् । उनले माधव नेपाललाई पहिले सहयोग गरेको भएपनि उनी आफ्नो घर भत्काएर अरुको बनाउनेतिर अग्रसर भएको देखेपछि उनको साथ छोडेको बताईन् ।
उनले पार्टीबाट फुटेर जानेहरुले आगामी निर्वाचनमा आफ्नो हैसियत देख्ने भन्दै एमाले टुक्राउनेहरुलाई इतिहासले जवाफ दिने समेत धारणा व्यक्त गरिन् ।
शाक्यले अब एमालेलाई गुटबन्दी मुक्त पार्टीको रुपमा अघि बढाउनुपर्ने धारणा व्यक्त गरिन् ।
