झापा र मोरङबाट लागुऔषध सहित ५ जना पक्राउ
बिराटनगर, फाल्गुन २० । झापा र मोरङ जिल्लाको छुट्टाछुट्टै स्थानहरुबाट लागुऔषध ब्राउनसुगर र नियन्त्रीत औषधी सहित ५ जनालाई प्रहरीले पक्राउ गरेको छ ।
हिजो बेलुका साढे ७ बजे झापाको कमल गाउँपालिका- ३ स्थितमा रहेको एक होटलमा लागुऔषध बेचबिखन भईरहेको भन्ने बिशेष सुचनाको आधारमा जिल्ला प्रहरी कार्यालय झापाबाट खटिएको प्रहरी टोलीले होटल संचालक ३५ बर्षीय सरोज थापा र शिवसताक्षी- ६ का ३० बर्षीय बिष्णु खड्कालाई ३८ ग्राम लागुऔषध ब्राउनसुगर सहित पक्राउ गरेको हो ।
त्यसैगरी मोरङको बिराटनगर- १६ स्थित भारतबाट नेपालतर्फ आउदै गरेको पैदल यात्री दमक नगरपालिका- ८ का २० बर्षीय रमेश राजबंशी र १९ बर्षीया कोपिला राजबंशीलाई ईलाका प्रहरी कार्यालय रानी र लागुऔषध नियन्त्रण ब्युरो बिराटनगरबाट खटिएको प्रहरी टोलीले लुपिजेसीक, डाईजेपाम, ऐभिल र फेनारागन गरी जम्मा ५२ एम्पुल नियन्त्रीत औषधी सहित पक्राउ गरेको हो भने ईलाका प्रहरी कार्यालय नेमुवाबाट खटिएको प्रहरी टोलीले मोरङको बुढिगंगा- ५ बाट १ के.जी. गाँजा सहित स्थानीय मुनिया खातुनलाई पक्राउ गरेको हो ।
लागुऔषध सहित पक्राउ परेका उनिहरुको सम्बन्धमा थप अनुसन्धान भईरहेको छ ।
