किरांत मोर्चाद्वारा इलाम २ उपनिर्वाचनको नैतिक बहिष्कार
इलाम । आगामी बैशाख १५ मा इलाम क्षेत्र नं २ को उपनिर्वाचनलाई किरांत मोर्चाले नैतिक बहिष्कार गरेको छ ।
मोर्चाद्वारा कोशी प्रदेश नामाकरण खारेजी र अधिकार सम्पन्न किरात राज्य घोषणा गर भन्ने मागका साथ बहिष्कार गरेको हो ।
मोर्चाद्वारा आज जारी प्रेस विज्ञप्तिमा भनिएको छ –
किरात मोर्चा किरात राज्य सभ्यता पुनः स्थापना गर्न लोकतान्त्रिक मूल्य मान्यतामा रहेर आन्दोलनरत संगठन हो । कोशी प्रदेश खारेजी, अधिकार सम्पन्न किरात राज्य पुनः स्थापना बिना हाम्रो संगठन राज्यको चुनाव लगायत राजनैतिक क्रियाकलापमा नैतिक बहिष्कार गर्दछ ।
हाल हुन गइरहेको ईलाम क्षेत्र नं – २, को उप निर्वाचनलाई नैतिक बहिष्कार गर्ने घोषणा गर्दछौं । यस्को निम्ति निरन्तर लोकतान्त्रिक अधिकार उपयोग गर्दै शान्तिपूर्ण बिरोध कोण सभाहरु प्रचार प्रसार लगायतका कार्यक्रमहरु गरि राज्यलाई कोशी प्रदेश खारेजी, अधिकार सप्पन्न किरात राज्य घोषणा गर्न माग गर्दछौं ।
