विराटनगरमा सडक तथा सामुदायिक कुकुरको बन्ध्याकरण सुरु
विराटनगर । सहारा एनिमल केयरसँगको सहकार्यमा विराटनगर महानगरपालिकाले सडक तथा सामुदायिक कुकुरको बन्ध्याकरण सुरु गरेको छ ।
विराटनगर–५ स्थित सहारा एनिमल केयरमा शनिबारदेखि पोथी कुकुरको बन्ध्याकरण सुरु गरिएको हो । विभिन्न वडाबाट सामुदायिक कुकुरलाई सो स्थानमा ल्याएर बध्याकरण गरिने महानगरका मेयर नागेश कोइरालाले बताउनुभयो । यसरी बन्ध्याकरण गरिएका कुकुरलाई रेविज खोपसमेत लगाइनेछ ।
मेयर कोइरालाले सामुदायिक कुुकुरको त्रासबाट महानगरवासीलाई मुक्त गर्ने बताउनुभयो । उहाँले सामुदायिक कुकुरका कारण मोर्डिङ वाक, इभिनिङ वाकमा समस्या भएको गुनासो आउने गरेको सुनाउनुभयो । उहाँले सडक तथा सामुदायिक कुकुरको संख्या वृद्धि नहोस् भनेर यसअघि पनि महानगरको अग्रसरतामा बन्ध्याकरण गरिएको उहाँको भनाइ थियो ।
वडा नम्बर ५ मा डा. रश्मी थापाको नेतृत्वमा १० कठ्ठा जमिन लिजमा लिएर कुकुरका लागि अस्पताल सुरु गरिएको छ । सोही स्थानमा आगामी असार पहिलो हप्तासम्म पोथी कुकुरको बन्ध्याकरण गरिनेछ । असारसम्म करिब २ सय कुकुरको बन्ध्याकरण गरी रेविजको खोप लगाउने लक्ष्य राखिएको महानगरको पशुपंशी शाखाका प्रमुख शुभनारायण यादवले जानकारी दिनुभयो । कुकुरको बन्ध्याकरणका लागि महानगरले चालु आर्थिक वर्षका लागि ५ लाख रुपैयाँ विनियोजन गरेको थियो ।
नियन्त्रणमा लिएको कुकुरलाई अस्पतालमा एक दिन राखेर मात्रै बन्ध्याकरण गरिनेछ । बन्ध्याकरणपछि पनि पोषिलो खानेकुरा खुवाएर दुई दिन राखिनेछ । सवारी साधनबाट जोगाउन बन्ध्याकरण गरिएका कुकुरको घाँटीमा टल्किने बेल्टसमेत बाँधिने डा. रश्मी थापाले जानकारी दिनुभयो ।
विराटनगरलाई जनावरमैत्री सहर बनाउन आफूले अभियान सञ्चालन गरेको डा. थापाले बताउनुभयो ।
उद्घाटन समारोहमा महानगरका प्रमुख प्रशासकीय अधिकृत राजेन्द्र पराजुली, वडा नम्बर ५ का अध्यक्ष सन्तोष न्यौपाने, पशुपंक्षी शाखाका प्रमुख शुभनारायण यादव, सहारा एनिमल केयरकी प्रमुख डा. रश्मी थापालगायतले मन्तव्य व्यक्त गर्नुभएको थियो ।
