कोरियामा अस्ताइन् इलामकी सोनु
इलाम– इलामको माई नगरपालिका १, तिलटारकी २० वर्षीया सोनु श्रेष्ठको दक्षिण कोरियामा मृत्यु भएको छ ।
छ महिनाअघि पढाइका लागि त्यहाँ पुगेकी श्रेष्ठको भदौ २ मा मृत्यु भएको खबर आएपनि कारण भने खुल्न नसकेको परिवारजनले बताएका छन् ।
गत फेब्रअरीमा उनी विद्यार्थी भिसामै कोरिया गएर उल्सान विश्वविद्यालयमा अध्ययनरत थिइन् ।
दक्षिण कोरियास्थित नेपाली समाज (सोनसिक)ले सोनुको शव पोस्टमार्टम भइसकेको र नेपाल ल्याउन पहलका लागि आग्रह गरेको छ । त्यहाँ शव राख्ने ठाउँसमेत नभएकाले नेपाल ल्याउन सोनसिकले परिवारजनलाई आग्रह पनि गरेको छ ।
सोनुका बुबा लीला श्रेष्ठको पनि अढाई महिनाअघि मलेसियामा मृत्यु भएको थियो । वैदेशिक रोजगारीकै लागि त्यहाँ पुगेका लीलाको जेठमा मृत्यु भएको थियो ।
सोनुको परिवारमा आमा, भाइ र बहिनी छन् । -पालिकापेज
