जेठ १५ गतेदेखि हराएका झापाका राजेशको शव सडेको अवस्थामा फेला
झापा । गत जेठ १५ गतेदेखि हराएका बाह्रदशी गाउँपालिका ५ फूलबारी का २२ वर्षीय राजेश हजामको शव फेला परेको छ । स्थानीय विरिङ खोलामा उत्खनन् गर्दा सडेको अवस्थामा शव फेला परेको हो ।
इलाका प्रहरी कार्यालय अनारमनीका प्रहरी नायव उपरीक्षक प्रकाश विष्टका अनुसार हजामको शव बाह्रदशी गाउँपालिका – ७ स्थित विरिङ खोलामा फेला परेको थियो ।
साविक डाँगीवारी ३ स्थित ‘लाफादी’ घाटको पश्चिमतर्फ खोला किनारमा अन्दाजी ५ फिट गहिरो खाडल खनेर हजामको शव पुरिएको अवस्थामा प्रहरीले उत्खनन् गर्दा भेटेको बाह्रदशी गाउँपालिका ७ का वडाध्यक्ष मित्रप्रसाद भट्टराईले जानकारी दिए ।
उनका अनुसार पानी बग्ने भागभन्दा ५-७ मिटर पर हजामको शव पुरिएको अवस्थामा प्रहरीले फेला पारेको हो । दुई दिन लगाएर गरिएको उत्खनन्को क्रममा हजामको शव फेला परेको हो । शुक्रबार विरिङ खोलाको दुई ठाउँमा उत्खनन् गरिएको थियो । तर, शव फेला परेको थिएन । यसअघि बाह्रदशी ६ स्थित एक घरमा उत्खनन् गरिएको थियो । हजामलाई हत्या गरेर घरको बरण्डामा गाडिएको आशंकामा उत्खनन् गर्दा हत्यामा प्रयोग गरिएको सामग्री प्रहरीले बरामद गरेको थियो ।
उत्खनन्का क्रममा नुनका बोरा, कपडा र हत्यामा प्रयोग गरिएको बाम्फोक बरामद भएको थियो । प्रहरीले यसअघि घटनामा संलग्न भएको आशंकामा बाह्रदशी ७ निवासी ३१ वर्षीय समिर राजवंशी, २१ वर्षीय आशिष थापा, २० वर्षीया मुना मेचे (राजवंशी) र १६ वर्षीय नरेश राजवंशीलाई पक्राउ गरेको थियो ।
पक्राउ परेका उनीहरुको बयानका आधारमा प्रहरीले आइतबार पुनः विरिङ खोलामा दुई वटा जेसीवी लगाएर उत्खनन् गरेको थियो । पक्राउ पर्नेमध्ये २० वर्षीया मुना र १६ वर्षीय नरेश राजवंशी भाउजू देवर हुन् भने ३१ वर्षीय समिर राजवंशी जेठाजु हुन् ।
गत जेठ १५ गते बाह्रदशी ५ निवासी भीम हजामको छोरा हराएको जेठ १७ गते प्रहरीमा खोजी कार्यका लागि भन्दै खोजपत्र परेको थियो । प्रहरीले गरेको अनुसन्धानका क्रममा हजामको हत्या गरेर शुरुमा भान्सा घरमा शव गाडेको खुलेको छ । पछि सो शव खोला किनारमा सारिएको अनुसन्धानले देखाएको प्रहरीको भनाई छ ।
यता घटनामा संलग्न भएको भनिएका गणेश दुबईमा छन् । घटना गराएर उनी विदेश गएको आशंका गरिएको छ । मुनाका श्रीमान अभय राजवंशी भने पहिलादेखि नै साउदी अरबमा छन् ।-न्यूज संजाल
