झापामा सडक दुर्घटना,दुईको मृत्यु
झापा । झापामा सडक दुर्घटनामा घाइते गम्भीर भएर उपचार गराइरहेका दुईजनाको अस्पतालमा मृत्यु भएको छ ।
प्रहरीका अनुसार शिवसताक्षी-८ का अन्दाजी ६१ वर्षीय गणेश खड्का र झापा ६ का ४० वर्षीय कमनसिंह लिंखाका ७ वर्षीय छोरा अस्मिन लिंखाको उपचारको क्रममा मृत्यु भएको हो । दवैजना कात्तिक १६ गते दुर्घटनामा परेका थिए ।
खड्काको बिएन्डसी अस्पतालको भेन्टिलेटरमा राखेर उपचार भइरहेकोमा आज बिहान अन्दाजी ५ बजे उनको मृत्यु भएको इलाका प्रहरी कार्यालय झिलझिलेले जनाएको छ ।
पूर्व–पश्चिम राजमार्गअन्तर्गत शिवसताक्षी-११ कृष्ण मन्दिरनजिक काँकरभिट्टाबाट धरानतर्फ जाँदै गरेको प्रदेश १ ०२–००१ ख ९५३० नम्बरको बसले सोही दिशातर्फ जाँदै गरेका साइकलयात्री खड्कालाई ठक्कर दिएको थियो ।
त्यस्तै, झापा ६ किरातचोकस्थित भित्री पक्की सडकखण्डमा मोटरसाइकलको ठक्करबाट लिंखा घाइते भएका थिए । उनको बिएनडसी अस्पतालमा आज बिहान ५ः१० बजे मृत्यु भएको हो ।
सुरुङ्गाबाट झापा बजारतर्फ जाँदै गरेको मे. ७ प ५७५९ नम्बरको मोटरसाइकलले पैदलयात्री सोही ठाउँ बस्ने वर्ष ४० वर्षीय कमनसिंह र उनका छोरा अस्मिनलाई ठक्कर दिएको थियो ।-झापा टुडे
