मोटरसाइकल चोर्ने इलामका एक ब्यक्ति पक्राउ
झापा, कात्तिक २९ । झापाको बिर्तामोडबाट मोटरसाइकल चोर्ने व्यक्तिलाई प्रहरीले इलाममा पक्राउ गरेको छ ।
दुई दिनअघि बिर्तामोड-१ वाल्मीकि स्कुलको अगाडिबाट हराएको मोटरसाइकलसहित चोरी गर्ने व्यक्ति इलामको माई नगरपालिकामा पक्राउ परेका हुन् ।
मंगलवार बिहान अन्दाजी १०ः३० बजे वाल्मीकि स्कुल अगाडिबाट मे. ६ प २८६७ नम्बरको २२० सिसीको पल्सर मोटरसाइकल चोरी भएको थियो ।
वाल्मीकिमा स्नातक पढ्दै गरेका बिर्तामोड ५ का सविन शेर्माले स्कुलअगाडि राखेको सो मोटरसाइकल हराएको थियो । हराउनेबित्तिकै उनले त्यसबारे इलाका प्रहरी कार्यालय बिर्तामोडमा जानकारी गराएका थिए ।
मोटरसाइकल खोजी गर्ने क्रममा हिजो साँझ ५ः३० बजे महमाई प्रहरी चौकीले सो मोटरसाइकलसहित इलाम माई ६ बस्ने २४ वर्षीय मनिष गिरीलाई पक्राउ गरेको हो ।
गिरीलाई मोटरसाइकलसहित राति नै इलाका प्रहरी कार्यालय बिर्तामोडमा ल्याइएको प्रहरी नायव उपरीक्षक प्रकाश विष्टले जानकारी दिएका छन् ।-झापाटुडे
