झापा, उदयपुर र सुनसरीबाट प्रतिबन्धित लागुऔषध सहित ५ जना पक्राउ
विराटनगर, कात्तिक २९ गते । झापा, उदयपुर र सुनसरीको बिभिन्न स्थानहरुबाट प्रतिबन्धित लागुऔषध सहित ५ जनालाई प्रहरीले पक्राउ गरेको छ ।
लागुऔषध नियन्त्रण व्यूरो काँकरभिट्टाबाट खटिएको प्रहरीको टोलीले कात्तिक २८ गते साँझ झापाको मेचीनगर नगरपालिका-६ पुरानो मेचीपुल स्थितबाट शिवसताक्षी नगरपालिका-११ का २२ बर्षीय रोशन दंगाललाई ४ ग्राम ५ सय ३० मिलिग्राम सहित पक्राउ गरेको हो भने ईलाम फाकफोकथुम गाँउपालिका-१ ठिङ्गेपुरका २७ वर्षिय बिशाल मगर १ ग्राम ७ सय ६० मिलिग्राम सहित पक्राउ परेका हुन् ।
यसैगरी प्रहरी चौकी लालपत्ता उदयपुरबाट कात्तिक २८ गते साँझ चेकजाँचमा खटिएको प्रहरी टोलीले त्रियुगा नगरपालिका-६ स्थितबाट ज.९प ३८०२ नम्बरको मोटरसाईकलका चालक त्रियुगा- ४ बगाहाका २४ बर्षीय सागर मगर र मोटरसाईकल पछाडी सवार २२ बर्षीय सौगात राईको साथबाट प्रतिवन्धित लागु औषध १५ एम्पुल फेलापारी नियन्त्रणमा लिएको हो ।
यसका साथै इलाका प्रहरी कार्यालय इटहरी सुनसरीको प्रहरी टोलीले कात्तिक २८ गते बेलुकी इटहरी उपमहानगरपालिका-५ का २७ बर्षीय बिष्णु चौधरीलाई १ ग्राम ६ मिलीग्राम लागुऔषध ब्राउन सुगर सहित नियन्त्रणमा लिएको थियो । प्रतिबन्धित लागुऔषध सहित पक्राउ परेका सबैजनाको सम्बन्धित प्रहरी कार्यालयहरुबाट थप अनुसन्धान भई रहेको छ ।
