झापा चारआली खानेपानीमा माओवादी उम्मेद्वार विजयी, काँग्रेस–एमालेका उम्मेद्वार पराजित
विराटनगर । झापा नेकपा एमालेको आधार जिल्ला हो । एमालेको प्रतिस्पर्धी दल काँग्रेस हो । २०७९ सालको निर्वाचनलाई आधार मान्ने हो भने झापामा माओवादी केन्द्र पाँचौं स्थान हो ।
तर, झापाको मेचीनगर–१२ स्थित चारआली साना शहरी खानेपानी उपभोक्ता तथा सरसफाई संस्थाको निर्वाचनमा भने कांग्रेस र एमालेका उम्मेद्वारलाई दोब्बर मतले पराजित गर्दै माओवादीका उम्मेद्वार विजयी भएका छन् ।
माओवादीका उम्मेद्वार राजन चिमरियाले अध्यक्ष पदमा विजयी मात्रै भएनन् उनको प्यानल नै जिताउन सफल भए । खानेपानी संस्थाको निर्वाचनमा नेपाली काँग्रेसको लोकतान्त्रिक समूह, नेकपा एमालेको प्रगतिशील समूह तथा नेकपा माओवादी केन्द्रसहित रास्वपालगायातका अन्य दलको साझा उम्मेद्वार समूह चुनावी प्रतिस्पर्धामा थिए । गत आइतबार सम्पन्न अन्तिम मतपरिणाम अनुसार नेकपा माओवादी केन्द्रको नेतृत्वले १२ पदमध्ये ११ पदमा जित निकालेको छ ।
खुल्ला सदस्यमा नेकपा एमालेका हरिप्रसाद घिमिरेबाहेक सवै विजयी उम्मेद्वार माओवादी केन्द्रको नेतृत्वको गठबन्धनका हुन् । तीन लेखा समितिसहित १२ पदका लागि निर्वाचनको लागि मतदान भएको थियो । माओवादी केन्द्र मेचीनगरका अध्यक्षसमेत रहेका चिमरियाले ९ सय ११ मत प्राप्त गर्दा एमालेका सन्तोषकुमार मेचेले ४ सय ९३ र नेपाली काँग्रेसका बालकुमार विष्टले २ सय ७२ मत ल्याएका थिए ।
नेकपा एमालेका पुष्पा गौतम खनाललाई ८९ र नेपाली काँग्रेसका उम्मेद्वार दिपा आचार्य पौडेललाई २२४ मतान्तरले पछि पार्दैं गठबन्धनकै मैया कार्की उपाध्यक्षमा विजयी बनिन् । निर्वाचन समितिका अनुसार कार्कीले ६०९, खनालले ५२० र पौडेलले ३८५ मत प्राप्त गरेका थिए ।
सचिवमा पनि साझाका प्रेमराज घिमिरे ६६४ मत प्राप्त गरी विजयी भए । उनी राष्ट्रिय स्वतन्त्र पार्टीका स्थानीय नेता हुन् । सचिवका प्रतिस्पर्धीहरु काँग्रेसका राजेन्द्रप्रसाद रिजालले ३४२ र एमालेका दामोदर घिमिरेले ५१६ मत प्राप्त गरे । कोषाध्यक्षमा पनि साझा उम्मेद्वार साउन मेचे (बादल)ले ५ सय ७७ मत ल्याएर विजयी बन्दा काँग्रेसका यमकान्त पौडेलले ३७८ र एमालेका प्रकाश बरालले ५५८ मत प्राप्त गरेका छन् ।
त्यसैगरी, साझा उम्मेदवारहरु पुरुषोत्तम सिग्देल (६१९), महिला सदस्य चन्द्रकला तदेबुङ् (६१३), तेजबहादुर लिम्बू (६७३), अञ्जु फेवादिन (५८९) विजयी भएका छन् । खुल्लाबाट एमालेका हरिप्रसाद घिमिरे (५८३) विजयी भए । लेखा समिति संयोजकमा साझाका अर्जुन खनाल (५६२), खुल्ला सदस्यमा रुद्रप्रसाद रिजाल (६२४), महिला सदस्य रितादेवी रिजाल न्यौपाने (५७९) विजयी भएका छन् । यो निर्वाचन मत परिणामले झापाको कन्काई ६ मा आगामी मंसिर १६ गते हुन लागेको उपनिर्वाचनमा समेत असर गर्ने स्थानीय बताउँछन् ।
