पथरी बजारमा भारतीय नम्बर प्लेटको मालबाहक ट्रकले मोटरसाइकललाई ठक्कर दिँदा घटनास्थलमै एक जनाको मृत्यु
मोरङ । मोरङमा दुर्घटना हुँदा एक पुरुषको घटनास्थलमै मृत्यु भएको छ ।
सोमबार बेलुका ७ बजेतिर पथरीशनिश्चरे नगरपालिका १ पश्चिम बस स्टेण्ड नजिकै दुर्घटना भएको हो ।
पूर्व–पश्चिम राजमार्गमा बेलबारीबाट उर्लाबारीतर्फ जाँदै गरेको प्र–१–०२–०४० प ६०२५ नम्बरको मोटरसाइकललाई सोही दिशाबाट जाँदै गरेको एनएल–०१ एडी ५५११ नम्बरको लहरीले ठक्कर दिएको थियो ।
ठक्करबाट मोटरसाइकलमा सवार पुरुषको घटनास्थलमै मृत्यु भएको हो । मृतकको तत्काल पहिचान खुलिसकेको छैन ।
प्रहरीले लहरी र चालक भारतको उत्तर प्रदेश मिर्जयापुर बस्ने ४२ वर्षीय दिनेशकुमार दासलाई नियन्त्रणमा लिएको छ । पक्राउ परेका दासमाथि थप अनुसन्धान भइरहेको जिल्ला प्रहरी कार्यालय मोरङले जनाएको छ ।
