धनकुटाका ट्रक धनी तथा चालक सहित चार जना सुनसरीबाट पक्राउ
इटहरी । सुनसरीमा ठूलो परिमाणको गाँजासहित चार जनालाई प्रहरीले पक्राउ गरेको छ ।
सुनसरीको कोशी गाँउपालिका वडा नं. ७ हरीपुरबाट पश्चिमतर्फ जाँदै गरेको प्र. १-०२-००२ ख ०४१४ नम्बरको ट्रकबाट गाँजा बरामद गरिएको हो । चालकले तत्काल ट्रक छाडेर भागेका थिए ।
उक्त ट्रकको डालाको भागमा फलामको पाताले वेल्डिङ गरी बक्स आकारको फल्स बटम बनाई उक्त बटमभित्र लुकाईछिपाई लैजाँदै गरेको अवस्थामा ११ वटा बोरामा ३४० किलोग्राम लागूऔषध गाँजा बरामद गरिएको थियो ।
घटनामा तत्काल फरार रहेका प्रतिवादीहरूको सम्बन्धमा सुक्ष्म रूपमा अनुसन्धान गर्दा ट्रक धनी तथा चालक धनकुटाको शहिदभूमी गाँउपालिका वडा नं. ४ पिप्लेडाँडा बस्ने ३० वर्षीय जयप्रकाश राईलाई पक्राउ गरिएको हो ।
उनको बयानको आधारमा पक्राउ पर्नेमा भोजपुरको पौवादुम्मा ६ बस्ने २२ वर्षीय समीर राई, सुनसरीको कोशी गाउँपालिका वडा नं. ८ बस्ने २२ वर्षीय रूपेश यादव र कोशी ८ का २५ वर्षीय भक्ति भन्ने विहारी मुखियालाई पक्राउ गरिएको हो ।
पक्राउ परेका चारैजनामाथि सुनसरी जिल्ला अदालतबाट म्याद थप गरी आवश्यक अनुसन्धान भइरहेको सुनसरी प्रहरीले जनाएको छ ।
