मुख्यमन्त्री शाहीलाई विश्वासको मत दिने एमालेका चार नेता प्रदेश सांसदबाट हटाइए
काठमाडौं । कर्णाली प्रदेशमा फ्लोर क्रस गर्ने चार सांसदलाई नेकपा एमालले पार्टीको साधारण सदस्य र सांसदबाट हटाउने निर्णय गरेको छ । प्रधानमन्त्रीको सरकारी निवास बालुवाटारमा जारी दसौं महाधिवेशन आयोजक कमिटी बैठकले फ्लोर क्रस गर्ने चार जनालाई पार्टी सदस्य र सांसद पदबाट कारबाही गर्ने निर्णय गरेको हो ।
एक केन्द्रीय सदस्यका अनुसार प्रकाश ज्वाला, नन्दसिंह बुढा, कुर्मराज शाही र अमरबहादुर थापालाई पार्टी सदस्य र सांसद पद नरहने गरी कारबाही गर्ने निर्णय गरेको छ । साथै बैठकको यो निर्णय यो निर्णय कार्यान्वयनका लागि कर्णाली प्रदेश सभामा पत्र लेख्ने निर्णय पनि बैठकले गरेको छ ।
ज्वाला केन्द्रीय सदस्य थिए भने अन्य ४ जना प्रदेश कमिटी सदस्य थिए । सांसद देवी ओलीले भने भूलवश फ्लोर क्रस गरेपछि सच्याए भन्दै आगामी दिनमा पार्टीको निर्णय मान्ने जवाफ पेस गरेपछि उनलाई थप स्पष्टीकरण सोध्ने निर्णय बैठकले गरेको छ । स्पष्टीकरण सोधिएका प्रदेशका पाँच सांसदले बिहीबार जवाफ पेस गरेका थिए ।
एमालेका ४ जना सांसदले फ्लोर क्रस गरेपछि कर्णाली प्रदेशका मुख्यमन्त्री महेन्द्रबहादुर शाहीले शुक्रबार प्रदेशसभाबाट विश्वासको मत प्राप्त गरेका थिए । उनको पार्टी नेकपा माओवादी केन्द्रका १२, नेपाली कांग्रेसका ६ र एमालेका ४ सहित २२ जना सांसद मत पाएपछि उनको पद जोगिएको हो । विश्वासको मतको लागि २० सांसद आवश्यक थियो ।
