प्रधानमन्त्री ओलीलाई विश्वासको मत पाउन मुस्किल
काठमाडौं । जनता समाजवादी पार्टी (जसपा)का अध्यक्ष महन्थ ठाकुर र बरिष्ठ नेता राजेन्द्र महतोले प्रधानमन्त्री केपी शर्मा ओलीलाई विश्वासको मत नदिने जानकारी गराएका छन् ।
प्रधानमन्त्री ओलीलाई भेट्न बालुवाटार पुगेका जसपाका अध्यक्ष ठाकुर र नेता महतोले विश्वासको मत दिन नसकिने जानकारी गराएका हुन् ।
आज विहान नेपाली कांग्रेसका सभापति शेरबहादुर देउवालाई भेटेर अध्यक्ष ठाकुर र बरिष्ठ नेता महतो बालुवाटार पुगेका थिए । उक्त भेटमा प्रधानमन्त्री ओलीले विश्वासको मत माग गरेका थिए ।
सोही क्रममा उनीहरुले आफूहरुको माग पूरा नभएको कारण प्रधानमन्त्री ओलीलाई विश्वासको मत दिन नसक्ने जानकारी गराएका हुन् ।
विश्वासको मतको आस नगर्न आफूहरुले जवाफ दिएको दिएको भन्दै नेता महतले भने, ‘पार्टीमा पनि अप्ठ्यारो भएकाले हामी तपाईलाई विश्वासको मत दिँदैनौं भन्यौँ । विश्वासको मत दिँदा पार्टी फुट्छ । पार्टी किन फुटाउनु ।’
त्यस्तै, उनीहरुले आफ्नो केही माग पूरा भएकाले प्रधानमन्त्री ओलीको विपक्षमा भने मत नदिने आश्वासन दिएका बताइएको छ । जवाफमा प्रधानमन्त्री ओलीले अदालतबाट अनुमति लिनुपर्ने भएकाले समय लागेको बताएका थिए ।
प्रधानमन्त्री ओलीलाई विश्वासको मत पाउन मुस्किल
प्रधानमन्त्री ओलीले विश्वासको मत लिने प्रयोजनका लागि सोमबार विशेष अधिवेशन बोलाइएको छ । ओलीले विश्वासको मत पाउन १३६ मत चाहिन्छ ।
प्रधानमन्त्री ओलीको नेकपा एमालेका १२१ सांसद रहेका छन्, भने ४९ सांसद भएको नेकपा (माओवादी केन्द्र)ले हालै मात्र समर्थन फिर्ता लिइसकेको छ । त्यस्तै, ६१ सांसद भएको नेपाली कांग्रेसले पनि विपक्षमा मत दिने निर्णय गरिसकेको छ ।
त्यस्तै, ३२ सांसद भएको जसपाको बाबुराम भट्टराई–उपेन्द्र यादव पक्षले यसअघि नै ओलीको विपक्षमा मत दिने निर्णय गरिसकेको छ, भने महन्थ –राजेन्द्र पक्षले पनि विश्वासको मत नदिने बताएका छन् । योसँगै प्रधानमन्त्री ओलीले विश्वासको मत पाउन मुस्किल भएको छ ।
प्रतिक्रिया दिनुहोस्
