सन्दीपले अदालत पेश गरेको अस्पतालको दर्ता किताब पनि शंकास्पद
काठमाडौं । नाबालिक बलात्कार आरोपित क्रिकेटर सन्दीप लामिछानेले पेश गरेको किशोरी जन्म हुँदाको अस्पतालको दर्ता किताब पनि शंकास्पद भेटिएको छ ।
२०७९ कात्तिक १५ गते जिल्ला अदालत काठमाडौंमा बयानका क्रममा सन्दीपले गौशाला २६ (पीडित किशोरी) को जन्मदर्ता रहेको वडाको अभिलेख, बसाइसराइ कागजात, कक्षा ८ को भर्ना किताब र अस्पतालको दर्ता किताबको फोटोकपी पेश गर्दै त्यसको सक्कल प्रति झिकाउन माग गरेका थिए । सन्दीपले पेश गरेको कागजातहरुमा गौशाला–२६ को जन्ममिति १८ जेठ २०६१ भएको दाबी गरिएको थियो ।
सन्दीपले आफूमाथि लागेको बलात्कार आरोपमा इन्कारी बयान दिएका थिए र साथसाथै किशोरीको उमेर १८ वर्ष पुगिसकेको दाबी गरेका थिए । त्यसैले घटना भएको दिन ५ भदौ २०७९ मा किशोरी १८ वर्ष पुगिसकेको पुष्टि गर्ने प्रमाणका रुपमा केही कागजात पेश गरेका थिए ।
पछिल्लो पटक अदालतले गौशाला २६ जन्मेको अस्पतालबाट दर्ता किताब झिकाएको थियो । अस्पतालबाट प्राप्त दर्ता किताब सन्दीपले बयानका क्रममा पेश गरेको कागजातसँग नमिलेको काठमाडौं जिल्ला अदालत स्रोतले बताएको छ ।
अस्पतालले पठाएको दर्ता किताबको पानामा १६ जना सुत्केरीहरुको विवरण छ । जसमध्ये चार जनाले मात्रै १८ जेठ २०६१ मा शिशु जन्माएका छन् ।
‘दर्ता किताबको विवरण भिडाउदा पीडितको आमाको नाममात्रै मिल्छ, थर मिल्दैन’, अदालत स्रोतले भन्यो । अनलाइनखबरले प्राप्त गरेको दर्ता किताबको प्रमाणित फोटोकपीमा आमाको नाम, उमेर, अस्पताल भर्ना र डिस्चार्ज मिति उल्लेख छ । जसमा गौशाला २६ को आमाको नामबाहेक अरु विवरण मिलेको छैन ।
सन्दीप पक्षले पीडितको उमेर १८ वर्ष पुगिसकेको दाबी पुष्टि गर्न पेश गरेको अरु कागजातहरु यसअघि नै शंकास्पद र बाझिने खालका थिए । यो प्रकरणमा उच्च अदालत पाटन र सर्वोच्च अदालतले अस्पतालको दर्ता किताबबाट पीडितको उमेरको बारेमा यकिन गर्नुपर्ने औंल्याएको थियो ।
सन्दीपले पेश गरेको अस्पतालको दर्ता किताबमा गौशाला–२६ को जन्म हुँदा आमाको उमेर २८ वर्ष उल्लेख थियो । यस आधारमा आमाको जन्म २०३३ सालमा भएको पुष्टि हुन्छ । तर सन्दीपले नै पेश गरेको बसाइसराइको कागजातमा भने आमाको जन्म मिति २०३५ साल फागुन उल्लेख छ ।
मुलुकी अपराध संहिता ऐन, २०७४ को करणीसम्बन्धी व्यवस्थामा १८ वर्षमुनिका बालिकासँग सहमतिमै यौन सम्पर्क गरे पनि बलात्कार मानिन्छ । जसमा १६ देखि १८ वर्षसम्मको बालिकासँग यौन सम्पर्क भए १० देखि १२ वर्षसम्म कैदको व्यवस्था छ ।
१८ वर्षमाथिको किशोरीसँग सहमतिमा यौन सम्पर्क भए बलात्कार अभियोग आकर्षित हुँदैन । बलात्कार भए ७ देखि १० वर्ष कैद सजाय हुने व्यवस्था छ ।
विहीबारदेखि सन्दीप लामिछाने विरुद्धको बलात्कार मुद्दामा जिल्ला अदालत काठमाडौंमा नियमित सुनुवाइ हुँदैछ । नाबालिक बलात्कार मुद्दाको थुनछेक बहसका क्रममा जिल्ला अदालत काठमाडौंले सन्दीपलाई पुर्पक्षका लागि थुनामा पठाएको थियो ।
तर उच्च अदालत पाटनले २० लाख रुपैयाँ धरौटीमा छाड्न आदेश दिएको थियो । सर्वोच्च अदालतले भने लामिछानेलाई विदेशका प्रतियोगितामा भाग लिन जान पाउने आदेश दिएको थियो । जिल्ला अदालतले पीडितलाई एक लाख रुपैयाँ अन्तरिम राहत उपलब्ध गराउन आदेश पनि दिएको छ ।
