इटहरीबाट उदयपुर जाँदै गरेको ट्याक्टर दुर्घटना, चालकको मृत्यु
इटहरी : इटहरीबाट निर्माण सामग्री लिएर उदयपुर जाँदै गरेको ट्याक्टर दुर्घटना हुँदा चालकको मृत्यु भएको छ ।
जिल्ला प्रहरी कार्यालय उदयपुरका अनुसार इटहरीबाट निर्माण सामग्री लिएर उदयपुरको बेलका नगरपालिका वडा नम्बर २ तर्फ जाँदै गरेको को २ त ६३४९ नम्बरको ट्याक्टर चौदण्डीगढी नगरपालिका–३ हात्तीसारमा पल्टिएर दुर्घटना भएको हो ।
दुर्घटनामा ट्याक्टर चालक तिलक राईको घटनास्थलमै मृत्यु भएको प्रहरीले जनाएको छ ।
फलामको ट्युब लोड गरिएको ट्याक्टर ओरालोमा अनियन्त्रित भएर दुर्घटना भएको प्रहरीको प्रारम्भिक अनुसन्धानबाट खुलेको छ । घटनाबारे थप अनुसन्धान भइरहेको प्रहरीले जनाएको छ ।
