`डिम्पल झा स्मृति छात्राबृति तथा छोरी संरक्षण कार्यक्रम`सम्पन्न
सञ्जय मिश्रा/रौतहट,२१ भदौ । रौतहटको पूर्विभेग दुर्गाभगवती गाउँपालिका–३ मत्सरीमा ‘डिम्पल झा स्मृति छात्रवृत्ति तथा छोरी संरक्षण कार्यक्रम’ भव्य रूपमा सम्पन्न भएको छ।
कार्यक्रम अन्तर्गत छोरी जन्माउने आमाहरुलाई सम्मान स्वरूप नगद पाँच–पाँच हजार रुपैयाँ वितरण गरिएको छ।
त्यस्तै, शैक्षिक क्षेत्रमा उत्कृष्ट नतिजा हासिल गर्ने विद्यार्थीलाई छात्रवृत्ति प्रदान गरिएको हो। कक्षा १२ मा ३.६ GPA ल्याएकी अनुष्का राम र ज्योति सराफलाई जनही २५–२५ हजार रुपैयाँ नगद पुरस्कार दिइएको छ।
कार्यक्रमका प्रमुख अतिथि नेपाल सद्भावना पार्टीका राष्ट्रिय अध्यक्ष तथा पूर्वमन्त्री अनिल कुमार झाले डिम्पल झाको योगदानको स्मरण गर्दै यस्तो प्रेरणादायी कार्यक्रम समाजमा सकारात्मक सन्देश दिने बताएका छन्।
उनले कार्यक्रम सफलतापूर्वक सम्पन्न गराउन वडा अध्यक्ष डी.के. झालाई धन्यवाद दिएका थिए।
सो अवसरमा दुर्गाभगवती गाउँपालिकाका प्रमुख प्रशासकीय अधिकृत नवीन कुमार श्रीवास्तव, नेता रेवन्त झा, मैथिली ब्राह्मण संघका कोषाध्यक्ष नवीन झा, मनोज झा लगायत स्थानीय सरोकारवाला, पत्रकार, भद्रभलाद्मी, विद्यार्थी, अभिभावक र ज्येष्ठ नागरिकहरूको उल्लेखनीय उपस्थिति रहेको थियो।
छोरी संरक्षणको सन्देश – छोरी जन्माउने आमालाई नगद सम्मान दिइनु समाजमा बढ्दै गएको छोरी भ्रूण हत्याजस्ता विकृति विरुद्ध सकारात्मक अभियान हो। – यसले छोरीलाई बोझ नभई गर्वको रूपमा लिनुपर्ने सन्देश दिन्छ।
उत्कृष्ट नतिजा ल्याउने विद्यार्थीलाई नगद छात्रवृत्ति दिनु गाउँस्तर मै विद्यार्थीहरूलाई अध्ययनमा प्रेरित गर्ने प्रभावकारी प्रयास हो। यसले शिक्षा प्रतिको आकर्षण बढाउँछ र प्रतिस्पर्धात्मक भावना जगाउँछ।
दिवंगत नेतृ डिम्पल झाको स्मृतिमा गरिएको कार्यक्रमले स्थानीय तहमा महिला नेतृत्वको योगदानलाई स्मरण मात्र गरेन, आगामी पुस्तालाई समेत प्रेरणा प्रदान गरेको छ। यस किसिमका कार्यक्रमहरूले सामुदायिक सहकार्य र सामाजिक उत्तरदायित्वको स्तर पनि उच्च बनाउँछन् ।
कार्यक्रम सामाजिक, शैक्षिक र सांस्कृतिक दृष्टिले समेत अनुकरणीय पहलका रूपमा रहेको देखिन्छ।
