“गगनेलाई लखेट्” भन्दै एमाले कार्यकर्ताले घेरेपछि स्वास्थ्यमन्त्री थापा सुकेधारासम्म लखेटिए
काठमाडौं, ३० वैशाख । स्वास्थ्य मन्त्री तथा कांग्रेस नेता गगन थापा कपनबाट लखेटिएका छन् । शनिवार विहान निजी गाडी चढेर एक स्थानीय कार्यकर्ताको घरमा पुगेका मन्त्री थापालाई स्थानीय एमाले कार्यकर्ताले लखेटेका हुन् । एमाले कार्यकर्ताको बिरोध र नाराबाजी छलेर कपन जोरधारातिर जाने क्रममा मन्त्री थापाको निजी नम्बर प्लेटको गाडीमा ढुंगासमेत प्रहार भएको प्रहरीले जनाएको छ ।
एमाले कार्यकर्ताहरुले ‘गगनेलाई लखेट् भन्दै’ सुकेधारासम्म लखेटेका छन् । एकतातिर मौन अवधि त अर्कोतिर निर्वाचन आचारसंहिता विपरीत मतदातालाई प्रलोभन दिएको आरोप लगाउँदै एमाले कार्यकर्ताले मन्त्री थापालाई घेराउ गरेर दुर्व्यवहार गरेका हुन् ।
आज बिहानै मन्त्री थापा आफ्नो निर्वाचन क्षेत्र बुढानीलकण्ठ नगरपालिका वडा नम्बर १० स्थित जोरधारामा गएका थिए । कांग्रेस समर्थकको घरभित्र रहेका मन्त्री थापा बाहिर निस्केर घरतिर जाने क्रममा एमाले कार्यकर्ताले घेराउ गरेको बताइएको छ ।
मन्त्री थापाले आफूले आचारसंहिता उल्लंघन नगरेको र कार्यकर्ताको घरमा आएको बताएका थिए । कार्यकर्तालार्इ भेट्दा पनि एमाले कार्यकर्ताहरूले दुव्यबहार गरेको बताएका छन् ।
