राजपाको आन्दोलनमा सीके राउत र भूमिगत संगठनहरुले सघाउनसक्ने आशंका
नवलपरासी, जेठ ३० । स्थानीय निर्वाचनको विरोध गर्दै राष्ट्रिय जनता पार्टी (राजपा) नेपालले गरेको आमहड्तालमा घुसपैठ हुनसक्ने भन्दै नवलपरासी जिल्ला सुरक्षा समितिले सुरक्षा सर्तकतासहित जिल्लामा निगरानी बढाएको छ ।
सुरक्षा व्यवस्था चुस्त र कडा पारिएकाले परासी क्षेत्रमा हुने निर्वाचनमा ढुक्क भएर सहभागी हुन पनि सुरक्षा समितिले मतदाताहरुलाई आग्रह गरेको छ ।
निर्वाचनका लागि परासी क्षेत्रमा खटिन लागेका मतदान अधिकृत र सहायक मतदान अधिकृतका लागि दिइएको दुईदिने प्रशिक्षण कार्यक्रममा प्रमुख जिल्ला अधिकारी उदयबहादुर रानाले राजपाको आन्दोलनले चुनावमा कुनै प्रभाव नपर्ने भन्दै ढुक्क भएर मतदान कार्यक्रममा सहभागी हुन आग्रह गरे । उनले सुरक्षा व्यवस्था कडा पारिएको दाबीसमेत गरे ।
राजपाको आन्दोलनमा सीके राउत र पहिचान नभएका केही भूमिगत संगठनहरुले सघाउनसक्ने आशंका सुरक्षा समितिको छ । परासी क्षेत्रका ७ स्थानीय तहमा २४० मतदान केन्द्र र १२० मतदानस्थल रहेका छन् ।
