पाथिभरा जाने यात्रु बोकेको ट्याक्सी दुर्घटना, २ को मृत्यु, २ जना गम्भीर घाइते
ताप्लेजुङ । ताप्लेजुङको पाथिभरा जाने यात्रु बोकेको ट्याक्सी दुर्घटना हुँदा मुत्यु हुनेको संख्या २ पुगेको छ । २ जना गम्भीर घाइते भएका छन् ।
दुर्घटनामा परी मोरङ उर्लाबारीकी २५ वर्षीय अनिता थापा घिमिरेको घटनास्थलमै र गम्भीर घाइते उर्लाबारी ४ कै २८ वर्षीय होमु घिमिरेको जिल्ला अस्पतालमा उपचारको क्रममा मुत्यु भएको जिल्ला प्रहरी कार्यालय ताप्लेजुङले जनाएको छ ।
सदरमुकाम फुङलिङबाट यात्रु लिएर गएको मे १ ज १३०८ नम्बरको ट्याक्सी भालुगौडे भन्ने स्थानमा यात्रु ओराल्न पछाडी सार्ने क्रममा चिप्लिएर सडकबाट २ सय मिटर तल खसेको ट्रफक प्रहरी संगम मगरले बताए । गम्भीर घाइते हुनेमा उर्लाबारी ४ कै २६ वर्षीय दिलिप घिमिरे र इलामका २३ वर्षीय चालक अमित श्रेष्ठ रहेका छन् ।
अर्का घाइते उर्लाबारी ८ का २३ वर्षीय अनिलजंग थापाको अवस्था सामान्य रहेको मगरले बताए । घाइतेको जिल्ला अस्पताल ताप्लेजुङमा उपचार भइरहेको छ । उक्त ट्याक्सीमा ६ जना सवार थिए ।
