धनकुटामा १८ औँ सहिद भीमनारायण गोल्डकप सुरु, उद्घाटन खेलमा सहलेसको जित
धनकुटा । धनकुटाको तल्लो टुँडिखेलमा १८ औँ शहीद भीमनारायण एक्स्ट्रिम एनर्जी ड्रिंक गोल्डकप फुटबल प्रतियोगिता हिजोबाट सुरु भएको छ । लामो इतिहास बोकेको प्रतियोगिताको उद्घाटन खेलमा सिराहाको सहलेस युवा क्लब विजयी भएको छ ।
उद्घाटन खेलमा सहलेसले राष्ट्रिय जागृति फुटबल क्लब इटहरीलाई ट्राइब्रेकरमा ४–३ गोलअन्तरले पराजित गर्दै प्रतियोगितामा सुखद सुरुआत गरेको हो । निर्धारित ९० मिनेट र अतिरिक्त समयमा दुवै टोलीले गोल गर्न नसकेपछि खेलको निर्णय ट्राइब्रेकरमार्फत गरिएको थियो ।
सहलेसका लागि दिवाकर चौधरी, फागुराम थारु, डेबिट टो मेसी र सुजन डंगोलले गोल गरे । रोमन भुजेलको प्रहार भने पोस्ट बाहिरिएको थियो । इटहरीका तर्फबाट निवास फुयाल, दोर्जे तामाङ र केल्भिनले गोल गरे भने सुजन चौधरीको प्रहार पोस्ट बाहिरियो । ओलाबी फिजको प्रहार सहलेसका गोलरक्षकले उत्कृष्ट बचाउ गरेका थिए ।
यस वर्ष प्रतियोगिताको विजेता टोलीले ६ लाख रुपैयाँ पुरस्कार प्राप्त गर्नेछ । अघिल्लो संस्करणको तुलनामा पुरस्कार राशिमा एक लाख रुपैयाँ वृद्धि गरिएको आयोजकले जनाएको छ । उपविजेता टोलीले तीन लाख रुपैयाँ प्राप्त गर्नेछ । प्रतियोगिता जेठ १० गतेदेखि १६ गतेसम्म सञ्चालन हुनेछ ।
प्रतियोगिताको उद्घाटन कोशी प्रदेशका आन्तरिक मामिला तथा कानुन मन्त्री इन्द्रमणि पराजुली ले गर्नुभएको थियो । २०३५ साल माघ २६ गते कोशी टप्पु क्षेत्रमा राज्यद्वारा मृत्युदण्ड दिइएका सहिद भीमनारायण श्रेष्ठको स्मृतिमा २०५५ सालदेखि प्रतियोगिता आयोजना हुँदै आएको आयोजकले जनाएको छ ।
